Տավուշի մարզում, գյուղատնտեսության զարգացումը հաճախ դժվարանում է նոր տեխնոլոգիաների բացակայության և ֆերմերներին՝ դրանք հասանելի չլինելու պատճառով։ Այդ խնդիրների լուծմանն է ուղղված Եվրամիության կողմից ֆինանսավորվող և ՄԱԿ-ի զարգացման ծրագրի կողմից իրականացվող «ԼԻԴԵՐ» ծրագիրը, որով մարզում ստեղծվել է երեք տեղական ակտիվ խումբ: Այս խմբերը համայնքների ներսում դարձել են զարգացման շարժիչ ուժ՝ աջակցելով սոցիալ-տնտեսական նորարար նախաձեռնությունների: Օրինակ՝ Բերդ համայնքում գործող «Ծիլի Ծովի» ՏԱԽ-ն աջակցել է ավելի քան 50 ծրագրի՝ նպաստելով զբաղվածության աճին, գյուղատնտեսության արդիականացմանը և մարզի տնտեսության աշխուժացմանը:
«Խումբը միավորված է Բերդ համայնքի հատկապես գյուղական համայնքները զարգացնող բազմաթիվ գաղափարների շուրջ, որոնք միահամուռ ջանքերով կյանքի են կոչվում։ Կարևորվում է գյուղական համայնքներում ապրող և արարող մարդկանց իրացված լինելու և ինքնադրսևորման հնարավորությունը՝ «Ծիլի Ծով» ՏԱԽ-ի միջոցով։ Ագրոդրոնի ծրագրում կարևորել ենք նորարարական բաղադրիչը, այն նոր շունչ է տալիս գյուղատնտեսությանը ու հասանելի դարձնում կարճ ժամանակում պահանջված ծառայությունները, օրինակ՝ հողերի պարարտացումը և վնասատուների դեմ պայքարը», – իր խոսքում նշում է «Ծիլի Ծով» տեղական ակտիվ խումբ ՀԿ խորհրդի նախագահ Նառա Պապյանը։
Բերդ համայքնի գյուղատնտեսական կյանքում ագրոդրոնի ծրագրի իրագործումը սպասված լավ նորություն էր․ այժմ համայնքի գյուղատնտեսներին տրամադրվում են ժամանակակից գյուղատնտեսական ծառայություններ՝ նորարարական տեխնոլոգիաների միջոցով։
««Տավուշ» հիմնադրամի առաքելությունն է նպաստել համայնքների կայուն զարգացմանը, և մեր մյուս բաղադրիչներից է նաև համայնքի տնտեսական զարգացումը, մասնավորապես գյուղատնտեսության զարգացումը, և հենց այդ նպատակով մենք ստեղծեցինք մեր «Ագրոկենտրոնը», որի համալրման ճանապարհին մեր առաջին մեծ հաջողությունը եղավ ՄԱԿ-ի Զարգացման ծրագրի հետ, հենց հատկապես «ԼԻԴԵՐ» ծրագրի, որի շնորհիվ մենք համալրեցինք մեր «Ագրոկենտրոնը» և ձեռք բերեցինք ագրոդրոն, որով տարածաշրջանում իրականացնում ենք բուժման ծառայություններ գյուղատնտեսական։ Ագրոդրոնի կիրառումը տարածաշրջանում նախատիպ չունի, բացառիկ է և կարևոր դեր է կատարում համայնքում։ Նրա դերը համայնքում այն է, որ ստեղծել է նոր մշակույթ գյուղատնտեսության մեջ, որը նպաստում է բերքի որակի լավարկմանը և առնվազն 20-ից 30% բերքատվության բարձրացմանը», – նշում է «Տավուշ» բարեգործական հիմնադրամի գործադիր տնօրեն Լուսիկ Աղաբաբյանը։
Ագրոդրոնի միջոցով համայնքը մեկ քայլով ևս մոտեցել է դեպի նորարար ու խելացի գյուղատնտեսությանը, իսկ «Տավուշ» հիմնադրամի համար այն նաև գործունեության կայունությունն ապահովելու հնաևավորություն է ստեղծում։
Տավուշի գյուղատնտեսները նոր տեխնոլոգիաների կիրառմամբ նկատելիորեն բարելավում են իրենց աշխատանքը։ Ամռան շոգ օրերին դաշտային աշխատանքները շարունակվում են, սակայն այսօր դրանք այնքան ծանր չեն, որքան նախկինում։ Նոր տեխնոլոգիաները ոչ միայն թեթևացնում են ֆիզիկական աշխատանքը, այլև օգնում ֆերմերներին խնայել ռեսուրսները՝ օգտագործել ավելի քիչ բուժանյութ, ինչը հանգեցնում է նաև արտադրանքի ինքնարժեքի նվազմանն ու եկամուտների ավելացմանը:
