Գետահովիտի մարզադաշտը մարդաշատ է ու աղմկոտ․ դաշտում տավուշեցի պատանի ֆուտբոլիստներն են, դաշտից դուրս երկրպագուները։ Հայաստանի օրհներգի հնչյունների ներքո մեկնարկում է «Ֆուտբոլը հանուն հավասար հնարավորությունների» ծրագրի եզրափակիչ խաղը։ Հույսի կամուրջն արդեն 5-րդ անգամ է անցկացնում առաջնությունը, նպատակը ֆուտբոլի միջոցով կրթության առանձնահատուկ պայմանների կարիք ունեցող երեխաների սոցիալական ներառմանը նպաստելն է։
Ֆուտբոլային հանդիպման եզրափակիչ փուլում խաղում էին Գանձաքարի, Մովսեսի, Թեղուտի և Կողբի թիվ 2 դպրոցների թիմերը։ Նախագիծը երախաներին հնարավորություն է տալիս զբաղվել սպորտով, և այդ միջոցով բարելավել ֆիզիկական ու մտավոր կարողությունները, զարգացնել սոցիալական հմտություններն ու ինքնավստահությունը։ Մեկնարկային փոխանցումը կատարում է ֆուտբոլի Հայաստանի երիտասարդական հավաքականի պաշտպանը, իջևանցի Արմեն Սարգսյանը։
Նախագծի շրջանակում կազմակերպված մրցաշարերին մասնակցել են Տավուշի մարզի 16 հանրակրթական ուսումնական հաստատությունների աշակերտները, այդ թվում՝ կրթության առանձնահատուկ պայմանների կարիք և հաշմանդամություն ունեցող երեխաններ։ Նախաձեռնողները վստահեցնում են՝ շարունակելու են այնքան, որ մարզի բոլոր դպորցները մասնակցեն։
Մրցապայքարում հաղթող ճանաչվեց Թեղուտի դպրոցը՝ ստանալով Տավուշի մարզային գավաթը։ «Ֆուտբոլը՝ հանուն հավասար հնարավորությունների Հայաստանում» ծրագիրն իրականացնում է «Հույսի կամուրջ» հասարակական կազմակերպությունը՝ «Երեխաների համար ՈՒԵՖԱ հիմնադրամի» ֆինանսական աջակցությամբ։
