Տավուշի մարզպետի աշխտակազմի 2024 թվականի աշխատանքների ներկայացման նպատակով դեկտեմբերի 25-ին տեղի ունեցավ Տավուշի մարզի խորհրդի տարեվերջյան ամփոփիչ նիստը, որի սկզբում Տավուշի մարզպետ Հայկ Ղալումյանը ներկայացրեց մարզպետի աշխատակազմի 2024 թվականի գործունեության հաշվետվությունը.այն իր մեջ ներառում էր իրականացված աշխատանքները՝ ըստ ոլորտների, արձանագրած արդյունքները և առաջիկայում նախատեսվող ծրագրերը: Մարզպետն ընդգծել է, որ աշխատակազմի 2024 թվականի աշխատանքային գործունեությունը եղել է բազմաոլորտ՝ բխելով Տավուշի մարզի բնակչության խնդիրներից։
«2024 թվականը Տավուշի մարզի համար շատ կարևոր տարի էր, լի տարբեր փորձություններով: Ինչպես գիտեք ապրիլ ամսից Տավուշի մարզում սկսվեց սահմանազատման և սահմանագծման գործընթացը: Մայիսի 25-26-ը տեղացած հորդառատ անձրևներով պայմանավորված հեղեղումների պատճառով առաջացավ արտակարգ իրավիճակ: Այսօր վստահ կարող եմ ասել որ կառավարության և ժողովրդի համատեղ ջանքերով հաղթահարեցինք այդ բոլոր դժվարությունները և դրան զուգահեռ մարզում իրականցված բազմաթիվ ծրագրեր չեն զիջում 2023թ-ին իրականացված ծրագրերին», – իր խոսքում նշեց Տավուշի մարզպետը։
Խոսուն թվեր կան գյուղատնտեսության, ճանապարհաշինության ոլորտներում. 2024 թվականի ընթացքում Տավուշի մարզում մթերված խաղողի ծավալը կազմել է 5953.6 տոննա՝ 1 կգ խաղողի գնային միջակայքը հասնելով 140-250 դրամի: Ընթացիկ տարվա ընթացքում վերանորոգվել է 390 կմ ճանապարհ, նորոգվել են հատկապես կարևոր նշանակության ճանապարհները: Կառավարության կողմից հաստատված սահմանամերձ բնակավայրերում բնակարանաշինության ծրագրերը նույնպես առաջնահերթություն են։ Տավուշի մարզում այժմ կառուցվում է 1249 բնակելի տուն, ինչը կարևոր քայլ է սահմանամերձ գյուղերի կենսունակության ապահովման համար:
Իջևան համայնքում կատարված աշխատանքները ներկայացրեց Իջևանի համայնքապետ Արթուր Ճաղարյանը՝ նշելով աշխատանքներն ընդգրկել է ողջ բազմաբնակավայր համայնքը:
2024 թվականի ընթացքում պետության աջակցությամբ, Բերդի համայնքապետարանի միջոցներով ու գործընկեր կառույցների հետ համագործակցության շրջանակներում Բերդ համայքնում բազմաբնույթ աշխատանքներ են իրականացվել: Աշխատանքների ամփոփ նկարագիրը ներկայացրեց համայնքապետ Աստղիկ Հակոբյանը:
Նոյեմբերյանի համայնքապետ Արսեն Աղաբաբյանի խոսքով՝ իրականացված նախագծերն ուղղված են եղել բնակավայրերի կենսապայմանների բարելավմանն ու ենթակառուցվածքների զարգացմանը:
Դիլիջան համայնքում կատարվել են ենթակառուցվածքների բարելավման աշխատանքներ, կրթական և սոցիալական ոլորտներում ներդրումներ, ինչպես նաև շարունակվում են ճանապարհաշինական նախագծերը։ Դիլիջան համայնքի ղեկավարի խոսքով՝ համայնքի բյուջեն պետական աջակցությամբ ավելացել է 343 մլն դրամով՝ կազմելով ավելի մեծ ներդրումային ծավալներ։
Տարեվերջյան ամփոփիչ հանդիպման վերջում Տավուշի մարզպետը շնորհակալագրեր և հուշանվերներ է հանձնել տարվա ընթացքում տարբեր ոլորտներում իրենց գործունեությամբ ու աշխատանքով աչքի ընկած մի շարք քաղաքացիների, բուժհիմնարկների, կրթական և մշակութային հաստատությունների մի շարք ուսուցիչների, տնօրենների, մասնավոր կառույցների ղեկավարների, մարզական և այլ բնագավառներում լավագույն արդյուքներ գրանցած ներկայացուցիչներին։
