Արվեստը, երկխոսությունն ու հանրային կարևոր թեմաների շուրջ մտորումը մարտի 16-ին համադրվել էին մեկ վայրում՝ Տավուշի մարզում։ «Քաղաքացիական երիտասարդական կենտրոնի» նախաձեռնությամբ Բերդ քաղաքում ներկայացվեց ինտերակտիվ թատրոն-ներկայացումը՝ «Լռությունից՝ որոշում» խորագրով։ Այն կազմակերպվել էր ՄԱԿ Անվտանգության խորհրդի 1325 բանաձևի՝ «Կանայք, խաղաղություն, անվտանգություն» օրակարգի հանրայնացման շրջանակում։ Պատահական չէր ընտրված արվեստի լեզուն․ կարևոր ուղերձները հենց արվեստի միջոցով են հաճախ հասնում մարդկանց՝ դառնալով ավելի կենդանի, հուզական և հասանելի։
Բեմում ներկայացվող պատմություններն անդրադառնում էին կանանց իրական փորձառություններին՝ պատերազմական և հետպատերազմական պայմաններում, համայնքային կյանքում նրանց ունեցած դերին ու ձայնին։ Ընտրված ինտերակտիվ ձևաչափը ստեղծել էր այնպիսի մթնոլորտ, որտեղ հանդիսատեսը սկզբում դիտորդ էր, իսկ ներկայացման ընթացքում դառնում էր նաև ակտիվ մասնակից։
Ներկայացումից հետո տեղի ունեցավ բաց քննարկում, որի ընթացքում մասնակիցները խոսեցին խաղաղության, անվտանգության և համայնքային որոշումների կայացման գործընթացներում կանանց մասնակցության կարևորության մասին։ Շեշտվեց, որ նման նախաձեռնությունները նպաստում են հասարակության մեջ ավելի ընդգրկուն ու հավասար մասնակցության մշակույթի ձևավորմանը։ Նախաձեռնությունը շարունակական է․ ծրագրի հաջորդ կանգառը մարտի 19-ին կլինի Գեղարքունիքի մարզում։
