Տեղեկատվական տեխնոլոգիական ամենամասշտաբային իրադարձությունը հյուրընկալվել էր Վանաձորում։ Տեխնոլոգիական մայրաքաղաքը Երևանից դուրս տեղափոխելու գաղափարը նոր շունչ էր բերել Լոռի ու մարզկենտրոնում ստեղծել գիտելիքի, նորարարության ու համագործակցության իսկական իրարանցում։ Սա արդեն 3-րդ Tech Week փառատոնն է, որի ճանապարհը սկսվել էր Ստեփանակերտից, անցել Գյումրիով, և այս տարի հասավ Վանաձոր։
Հուլիսի 4-ից 6-ն ընթացող տեխնոլոգիական միջոցառման օրակարգն առաջարկում էր կրթական ցուցահանդեսներ, աշխատարաններ, պանելային քննարկումներ՝ տարբեր թեմաներով ոլորտային փորձագետների հետ։ Տեխնոեռօրյան հագեցած էր ու հետաքրքիր։
«Tech Week»-ի այս տարվա ուղղություններից մեկն արհեստական բանականությունն էր․ փորձագետի խոսքով՝ անհրաժեշտ է հասկանալ բոլորիս կյանք ներխուժած արհեստական բանականության օգտակար կողմերն ու հնարավոր ռիսկերը՝ առավելագույնս ճիշտ օգտվելու համար։
Միջոցառման գլխավոր նպատակը համայնքային համաչափ և շարունակական զարգացումն է։ Մարզերում ստեղծել նոր թիմեր և մարդկանց զինել գիտելիքով ու հմտություններով․ ահա այս կերպ կստեղծվեն նոր հնարավորություններ։
Տեխնոլոգիական եռացող այս մթնոլորտը Վանաձորում այնքան վարակիչ էր, որ Տավուշ Մեդիան սիրով հարևան մարզ ուղևորվեց՝ մասնակցելու և արձանագրելու ոլորտի կարևորագույն իրադարձություններից մեկը։ Հայկական տեղեկատվական տեխնոլոգիաների հաջորդ մեծ հանդիպումը ծրագրված է արդեն 2026 թվականին։
