ՀՀ Կառավարության, Իջևանի համայնքապետարանի և ԵՊՀ Իջևանի մասնաճյուղի փոխհամագործակցությամբ և համաֆինանսավորմամբ այս տարի ամբողջությամբ կհիմնանորոգվի ԵՊՀ Իջևանի մասնաճյուղի՝ Ուսանողական 1 փողոցի մասնաշենքի տանիքը, որը միևնույն ժամանակ Իջևան քաղաքի Սպանդարյան 1 և 2 բազմաբնակարան շենքերի բակային տարածքն է։
Հիմնանորոգումն իրականացվելու է 2025 թ․ սուբվենցիոն ծրագրի շրջանակում։ Ծրագրի ընդհանուր արժեքը կազմում է 82.304.552 դրամ, որից համայնքի մասնաբաժին 20.576.138 դրամը կվճարի ԵՊՀ Իջևանի մասնաճյուղը, իսկ ՀՀ Կառավարության ֆինանսական մասնակցությունը
կկազմի 61.728.414 դրամ:
Մասնաճյուղի հիմնադրման օրվանից այս հիմնախնդիրը ստացել է միայն մասնակի լուծումներ։ Տանիքի վատ վիճակը տարիներ շարունակ հանգեցրել է ներշենքային պայմանների վատթարացման՝ բացասաբար ազդելով թե՛ ուսումնական գործընթացի արդյունավետ կազմակերպման, թե՛ շենքում անվտանգ միջավայրի ապահովման վրա։
