Աչաջրից Էմմա Բալասյանի սերն ու ձգտումը երաժշտության հանդեպ ձևավորվել են դեռ վաղ տարիքում ու նրան տարել դեպի Աչաջրի մշակույթի տուն, որտեղ էլ նա կատարեց իր առաջին քայլերը դեպի երաժշտության և մշակույթի մեծ աշխարհ։ Տարիների ընթացքում Էմման բազմիցս հնարավորություն է ունեցել ներկայացնելու իր հայրենի գյուղն ու համայնքը տարբեր բեմերում։ Իսկ արդյունքները խոսուն են․ նրա պատվոգրերն ու մրցանակները վկայում են ստացած գնահատանքի մասին։ Եվ ահա, տարիների փորձից հետո Էմմա Բալասյանն առաջին անգամ հանդես է գալիս մենահամերգով՝ հենց այն բեմում, որտեղ ամեն ինչ սկսել էր։
Աշխատասիրություն, նվիրվածություն և պատասխանատվություն։ Հենց այս երեք արժեքների համադրությամբ կարելի է հասնել իրական հաջողության։ Այժմ Էմման սովորում է Դիլիջանի արվեստի պետական քոլեջում։ Իսկ առաջիկայում նրան սպասվում է կարևոր ու պատասխանատու ելույթ՝ Վիեննայի հեղինակավոր երաժշտական փառատոնում, որտեղ նա կներկայացնի Հայաստանը։
Էմմայի երաժշտական ուղին պատմություն է այն երազանքի մասին, որը ծնվել է գյուղում, ձևավորվել աշխատասիրությամբ և վերածվել հպարտության՝ հանրության համար։ Եվ այս ամենն արվեստի մի դրսևորմամբ՝ երաժշտությամբ, որն արտահայտում է այն, ինչ բառերը չեն կարող փոխանցել։
