Անձնական տվյալների պաշտպանության գործակալությունը Տավուշից մեկնարկել է իրազեկման և վերապատրաստման ծրագիր, որի նպատակն է բարձրացնել ՀՀ հանրակրթական դպրոցներում երեխաների անձնական տվյալների պաշտպանության իրավունքի վերաբերյալ իրազեկվածության մակարդակը։
Ծրագիրն իրականացվել է Կրթության, գիտության, մշակույթի և սպորտի նախարարության, Հայաստանում Յունիսեֆ-ի ներկայացուցչության և «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի աջակցությամբ։
Գործակալության մասնագետների կողմից մշակվել է «Անձնական տվյալների մշակման իրավակարգավորումներն ուսումնական հաստատություններում» վերնագրով գործնական ձեռնարկ, որը կարող է ծառայել որպես հիմնական ուղեցույց բոլոր ուսումնական հաստատությունների համար։ Այն պարունակում է իրավական և գործնական հստակ ցուցումներ, որոնք կօգնեն դպրոցներին ապահովել տվյալների մշակման օրինականությունն ու երեխաների իրավունքների պաշտպանությունը։
Ծրագրի երկրորդ փուլի ընթացքում Գործակալության մասնագետները վերապատրաստել են Տավուշի մարզի հանրակրթական դպրոցների շուրջ 210 ուսուցիչների։ Վերապատրաստումները ներառել են ինչպես իրավական գիտելիքներ, այնպես էլ գործնական հմտություններ՝ երեխաների անձնական տվյալների պաշտպանությունը դպրոցական միջավայրում ապահովելու համար։
Վերապատրաստումների հաջող արդյունքներից ելնելով՝ Գործակալությունը նախատեսում է ծրագիրը շարունակել՝ ընդգրկելով Հայաստանի բոլոր հանրակրթական դպրոցները։
Արդյունքում բազմաթիվ ուսուցիչներ կստանան գիտելիքներ և հմտություններ, որոնք կօգնեն արդյունավետորեն պաշտպանել երեխաների անձնական տվյալները։
