Օգոստոսի 12-ին աշխարհի տարբեր հատվածներում հազարավոր մարդիկ ականատես են դարձել հազվագյուտ երկնային երևույթի՝ արևի ամբողջական խավարման։ Լուսինն ամբողջությամբ փակել է Արեգակի սկավառակը, ինչի հետևանքով մի քանի րոպեով շրջակայքը մթնել է։
Խավարման առաջին փուլերը տեսանելի են եղել Ռուսաստանի Պրոնչիշչև թերակղզու շրջանում։ Այնուհետև երևույթը շարունակվել է Արկտիկայի և Գրենլանդիայի վրայով՝ հասնելով Իսլանդիա և Իսպանիա։ Իսպանիայի համար խավարումն առանձնահատուկ նշանակություն է ունեցել․ երկիրը վերջին անգամ ամբողջական արևի խավարում տեսել էր 1905 թվականին։ Մալյորկա երկնային երևույթին հետևելու նպատակով ժամանել էին զբոսաշրջիկներ ԱՄՆ-ից, Ռուսաստանից, Բելգիայից, Գերմանիայից և այլ երկրներից։
Եվրոպայի մի շարք երկրներում, այդ թվում՝ Անգլիայում և Ֆրանսիայում, հնարավոր է եղել դիտել մասնակի խավարումը։ Անգլիայի որոշ հատվածներում Արեգակի սկավառակի շուրջ 90 տոկոսն է ծածկվել։ Խավարումը դիտող քաղաքացիներին մասնագետները նախապես հորդորել էին օգտագործել միայն հավաստագրված արևային ակնոցներ և հատուկ պաշտպանիչ միջոցներ՝ աչքերը վնասումից պաշտպանելու համար։
Թեպետ արևի խավարումը Հայաստանից տեսանելի չէր, սակայն մեր երկրի երկնքից հնարավոր կլինի հետևել մեկ այլ տպավորիչ աստղագիտական երևույթի՝ աստղաթափին։ Օգոստոսի 12-ի լույս 13-ի գիշերը գագաթնակետին է հասնում Պերսեիդների մետեորային հոսքը, որը երկնքում կարող է դիտարժան «աստղաթափ» ստեղծել։
Լուսանկարնեը՝ Reuters
