Բագրատաշենում ձիթենին դարձել է տեղական գյուղատնտեսության առանձնահատկություններից մեկը։ Տասնամյակներ առաջ Հունաստանից բերված շիվերն այսօր պտղաբերում են Տավուշի հողում, իսկ գյուղի բնակիչներից շատերն արդեն սեփական ձիթենու այգիներն ունեն։ Այս մշակաբույսի շուրջ ձևավորվող հետաքրքրությունն էլ հիմք է դարձել նոր նախաձեռնության՝ Ձիթենու փառատոնի համար։
Բագրատաշենի բնակլիմայական պայմաններին ձիթենին առաջին հայացքից անսովոր մշակաբույս է թվում։ Սակայն տարիների փորձը ցույց է տվել, որ այն կարող է հաջողությամբ աճել այստեղ։ Առաջին շիվերն աստիճանաբար հարմարվել են տեղանքին, իսկ ձիթենու մշակությունը որոշ բնակիչների համար վերածվել է շարունակական աշխատանքի և տնտեսությունը զարգացնելու հնարավորության։ Այսօր ձիթենին Բագրատաշենի գյուղատնտեսական պատկերի ճանաչելի մասն է։ Փառատոնն էլ այդ առանձնահատկությունը հանրահռչակելու, տեղական արտադրողներին ներկայացնելու և բնակավայրի մասին պատմելու նոր հարթակ է դարձել։
Նոյեմբերյանի համայնքապետարանի նախաձեռնությամբ անցկացված միջոցառման կարևոր բաղադրիչը տեղական արտադրանքի ցուցադրությունն էր։ Տաղավարներում արտադրողներն ու արհեստավորները հնարավորություն ունեին ներկայացնելու իրենց աշխատանքը, անմիջական շփվելու այցելուների հետ և ընդլայնելու իրենց արտադրանքի իրացման հնարավորությունները։ Նման միջոցառումները կարող են նպաստել նաև տեղական արտադրողների միջև համագործակցությանն ու համայնքի տնտեսական ակտիվության բարձրացմանը։
Փառատոնի հետագա զարգացումը մեծապես կախված կլինի դրա շարունակականությունից, արտադրողների մասնակցության ընդլայնումից և այցելուների համար ձևավորվող առաջարկներից։ Ձիթենու այգիները, տեղական արտադրանքը և համայնքի մշակութային միջավայրը կարող են փոխլրացնել միմյանց՝ ձևավորելով Բագրատաշենի համար հետաքրքիր զբոսաշրջային ուղղություն։
Հեղինակ՝ Հրանուշ Անանյան
