Բագրատաշենի սահմանային անցակետում այսօր՝ ապրիլի 17-ին․ իրավիճակը, թեև վերահսկելի, բայց մի քանի ժամով լարված էր․ այստեղ լայնածավալ հատուկ ուսումնավարժություն էր անցկացվում։ Ըստ սցենարի՝ «Բագրատաշենի» անցակետի պահեստներից մեկում հրդեհ էր բռնկվել։
Օրվա պատասխանատուն անմիջապես կապ հաստատեց ՆԳՆ օպերատիվ կառավարման կենտրոնի 112 ծառայության հետ՝ զուգահեռաբար կազմակերպելով շենքի աշխատակիցների և անցակետում գտնվող քաղաքացիների արագ ու կազմակերպված տարահանումը։ Տարահանվածները տեղափոխվեցին նախապես սահմանազատված անվտանգ գոտի, որտեղ արդեն ձևավորվել էր առաջին օգնության կետը․ այստեղ բուժաշխատողները օգնություն էին ցուցաբերում վնասվածքներ ստացած անձանց։
Ուսումնավարժությունն անցկացվում էր միաժամանակ երեք տեղամասերում՝ ապահովելով բազմաշերտ արձագանքման համակարգի գործարկումը։ Կարևոր դերակատարում ունեցան Տավուշի մարզային փրկարարական վարչության ճառագայթային, կենսաբանական և քիմիական արձագանքման մասնագետները, որոնք, պնևմատիկ բարձիկների կիրառմամբ՝ կարճ ժամանակում դադարեցրին ամոնիակի արտահոսքը, կանխելով հնարավոր վտանգը։
Միաժամանակ, հրդեհի մարման աշխատանքներին միացան Նոյեմբերյանի հրշեջ-փրկարարական ջոկատի 2 մարտական հաշվարկները։ Դեպքի վայր ժամանելուց հետո նրանք իրականացրին անհրաժեշտ բացազատում և սկսեցին հրդեհաշիջման ինտենսիվ աշխատանքներ։ Կարճ ժամանակ անց հրդեհը մեկուսացվեց, ապա ամբողջությամբ մարվեց։ Գործողությունների ընթացքի մասին պարբերաբար հաղորդումներ էին փոխանցվում ՆԳՆ օպերատիվ կառավարման կենտրոն։
Վարժանքի ավարտին ուսումնավարժության ղեկավարը բարձր գնահատեց համակարգված աշխատանքը՝ ընդգծելով, որ նման միջոցառումները, նախ՝ ստուգում են ծառայությունների պատրաստվածությունը, ապա նաև նպաստում են տարբեր կառույցների միջև համագործակցության արդյունավետության բարձրացմանը։
Բագրատաշենում անցկացված ուսումնավարժությանը ներգրավված էին ՆԳՆ Փրկարար ծառայության Տավուշի մարզային փրկարարական վարչությունը, ԱԱԾ Սահմանապահ զորքերը, ՊԵԿ աշխատակիցները, Պտղավանի կամավորական փրկարարական ջոկատը, պարեկային ծառայությունը, Նոյեմբերյանի բժշկական կենտրոնը և վթարավերականգողական ուժերը։
Արտակարգ իրավիճակներում արագ արձագանքն ու համակարգված աշխատանքը կարող են վճռորոշ լինել մարդկային կյանքեր փրկելու գործում։
