Սննդամթերքի անվտանգության տեսչական մարմնի կողմից Տավուշի մարզի Դիլիջան քաղաքում գործող «ԴԻԼԻ» ՍՊ ընկերությունում իրականացված ստուգման շրջանակում լաբորատոր փորձաքննության են ենթարկվել ընկերության արտադրատեսակներից վերցված նմուշները։
Հետազոտությունների արդյունքներով պարզվել է, որ ընկերության կողմից արտադրվել են սննդամթերքի անվտանգության պահանջներին չհամապատասխանող և սպառողների առողջության համար վտանգ ներկայացնող արտադրատեսակներ։ Մասնավորապես, «Պանիր Մոցարելլա», «Պանիր Բուրատտա» և «Պանիր Գաուդա» արտադրատեսակների նմուշներում հայտնաբերվել են աղիքային ցուպիկի խմբի մանրէներ (ԱՑԽՄ), «Թթվասեր» արտադրատեսակի նմուշում՝ ԱՑԽՄ, խմորասնկեր և բորբոսասնկեր, իսկ «Յոգուրտ դեղձի» և «Յոգուրտ ելակի» արտադրատեսակների նմուշները չեն համապատասխանել խմորասնկեր ցուցանիշներով։
Ըստ ՍԱՏՄ-ի՝ նշված արտադրատեսակները չեն համապատասխանել «Կաթի և կաթնամթերքի անվտանգության մասին» Մաքսային միության տեխնիկական կանոնակարգով սահմանված անվտանգության և հիգիենիկ պահանջներին։
Տեսչական մարմնի ղեկավարի որոշմամբ՝ «ԴԻԼԻ» ՍՊԸ-ի կաթնամթերքի արտադրամասի արտադրական գործունեությունը կասեցվել է մինչև արձանագրված խախտումների ամբողջական վերացումը։
