«Խոստում» խաչերի նախաձեռնությունն առաջիկա օրերին ուխտագնացությամբ այցելելու է Տավուշի մարզի Բերդի տարածաշրջան։
Բոլոր ցանկացողները կարող են միանալ ուխտագնացությանը Չինարիի, Այգեձորի, Արծվաբերդի, Չորաթանի, Մովսեսի, Վերին Կարմիրաղբյուրի, Ներքին Կարմիրաղբյուրի, Այգեպարի, Նավուրի, Վարագավանի, Պառավաքարի, Բերդի եկեղեցիներում՝ սեպտեմբերի 3-ին, 4-ին և 5-ին։
«Խոստումը» համահայկական նախաձեռնություն է, որի առաքելությունը հայության համախմբումն է հավատքի և ազգային արժեքների շուրջ։ «Խոստում» խաչերում ամփոփված են քարերի մասունքներ աշխարհի բոլոր կողմերի հայկական գործող և խոնարհված եկեղեցիներից, ինչպես նաև Մասիսի ու Սիսի գագաթներից, պատմական Հայաստանից, Ջավախքից։ 2026-ի հուլիսի 5-ից խաչերը ուխտագնացությամբ շրջում են Հայաստանի սրբավայրերով և օրհնություն ստանում։ Մեկ տարի անց միայն՝ 2027-ի հուլիսի 5-ին, խաչերը կավարտեն ուխտագնացությունը և կհանձնվեն սեփականատերերին։ Գոյացած միջոցները կուղղվեն կրթական, մշակութային, հոգևոր ծրագրերի, նախագծի առաջին և երկրորդ՝ համաքրիստոնեական փուլի իրագործմանը։
Մինչ այս, «Խոստումի» ուխտագնացությունն անցել է ավելի քան 200 եկեղեցիներով Հայաստանի տարբեր մարզերում։ Բերդի տարածաշրջանում ուխտագնացության ժամերը հստակ իմանալու համար այցելեք khostum.am պաշտոնական կայք, ինչպես նաև նախաձեռնության Facebook, Instagram, YouTube էջեր։
«Խոստում» նախաձեռնության մասին
«Խոստում» խաչերի ուխտագնացության պաշտոնական մեկնարկը տրվել է 2026 թվականի հուլիսի 5-ին Հաղպատի վանական համալիրում։ Հենց այստեղ՝ հինգ տարի առաջ, ծնվել էր նախաձեռնության գաղափարը։ Առաջիկա մեկ տարում «Խոստում» խաչերը կշարունակեն ուխտագնացությունը Հայաստանի եկեղեցիներով ու սրբավայրերով։ Ընթացքին հնարավոր է հետևել նախաձեռնության պաշտոնական՝ Khostum.am կայքի կենդանի քարտեզի միջոցով և միանալ երթին ցանկացած կետում։
Ուխտագնացության ավարտից հետո՝ 2027 թվականի հուլիսի 5-ին, օրհնություն ստացած խաչերը կհանձնվեն տերերին։
Նախաձեռնության առանցքում սահմանափակ քանակով ստեղծված բացառիկ խաչերն են՝ 5137 ոսկեգույն և 803 արծաթագույն։ Խաչերը ձեռագործ են, ունեն անհատական համար և կրում են հայկական սրբավայրերի, Ամենայն Հայոց կաթողիկոսների կամ Հայ Առաքելական եկեղեցու սրբադասած անձանց անուններ։ Խաչերում ամփոփված են քարերի մասունքներ, որոնք հավաքվել են աշխարհի բոլոր կողմերի հայկական հոգևոր կենտրոնների սրբավայրերից՝ խորհրդանշական կամուրջ ստեղծելով աշխարհասփյուռ հայերի և նրանց հոգևոր ժառանգության միջև։
«Խոստում» նախաձեռնության գաղափարի առանցքում նաև սոցիալական պատասխանատվությունն է։ Արծաթագույն խաչերի իրացումից գոյացած միջոցները «Խոստում» հիմնադրամի միջոցով կուղղվեն կրթական, մշակութային և սոցիալական ծրագրերի՝ նպաստելով ազգային արժեքների պահպանմանն ու տարածմանը, իսկ ոսկեգույն խաչերի միջոցների հիմնական մասով կիրագործվի նախագծի երկրորդ՝ համաքրիստոնեական փուլը։ Արծաթագույն խաչերի մի մասն էլ կշնորհվի այն անհատներին, ովքեր նշանակալի ներդրում են ունեցել Հայաստանի և հայ ժողովրդի զարգացման, պետականության, գիտության, կրթության, մշակույթի, սպորտի և հասարակական կյանքի տարբեր ոլորտներում:
Այսպիսով, «Խոստում» նախաձեռնությունը ոչ միայն ազգայինի և հոգևորի խորհրդանիշ է, այլև շարունակական ճանապարհ, որի յուրաքանչյուր փուլ նոր իմաստ ու արժեք է հաղորդում խաչին։
