Խաղաղության պայմանագրի կնքումը բխում է նաև Ադրբեջանի շահերից․ այսօր Իջևանում կայացած ասուլիսի ընթացքում հայտարարեց ՆԱՏՕ-ի նախկին գլխավոր քարտուղար, «Ռասմուսեն» գլոբալ միջազգային քաղաքական խորհրդատվական կազմակերպության հիմնադիր նախագահ Անդերս Ֆոգ Ռասմուսենը: Վերջինս Իջևան էր այցելել Եվրոպական միության դիտորդական առաքելության հետ հանդիպելու նպատակով:
Անդերս Ֆոգ Ռասմուսենսը նաև նշեց․ «Հայաստան եմ եկել երեք կարևոր ուղերձով: Առաջինը հետևյալն է․ մենք խաղաղություն ենք ուզում Հարավային Կովկասում․ ես ողջունում եմ Հայաստանի և Ադրբեջանի միջև խաղաղության համաձայնագիրը: Կարծում եմ, որ վարչապետը մեծ խիզախություն է ցուցաբերել համաձայնելով այս պայմանագրի ստորագրմանը: Այժմ գնդակն Ադրբեջանի դաշտում է և ցանկանում եմ, որ Բաքուն հնարավորինս արագ ստորագրի համաձայնագիրը: Երկրորդ ուղերձս այն է, որ ավելի ուժեղ լինեն ՀՀ-ԵՄ կապերը: Երրորդ ուղերձս իմ հայտարարությունն է, որ օժանդակում եմ ՀՀ վարչապետի «Խաղաղության խաչմերուկ» նախագծին: Եթե այն իրականացվի, ապա կզարգանան առևտրային հարաբերությունները Կովկասում»,- նշեց ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը:
Լուսանկարը՝ Արմենպրեսի
