Տավուշի մարզում շարունակվում են ազգային մշակույթի պահպանմանն ու երիտասարդ սերնդին հայկական արժեքներին հաղորդակից դարձնելու նախաձեռնությունները։ Դիլիջանի Հովհաննես Շարամբեյանի անվան գեղարվեստի դպրոցում «Green Rock» հիմնադրամի «NextGen» նախագծի շրջանակում իրականացվել է «Պարում են աղջիկները՝ ծաղկում է Դիլիջանը» նախագիծը, որի շրջանակում 20 աշակերտի համար ձեռք են բերվել հայկական ավանդական տարազներ։ Նախաձեռնության նպատակն էր երիտասարդների շրջանում բարձրացնել հետաքրքրությունը ավանդական մշակույթի և ազգային պարի նկատմամբ՝ ստեղծելով առավել նպաստավոր պայմաններ մշակութային կրթության և ինքնության ներկայացման համար։
Ազգային մշակույթի պահպանումը սկսվում է հենց համայնքներից, իսկ երիտասարդների ներգրավվածությունը կարևոր պայման է մշակութային ժառանգության շարունակականության համար։ «NextGen» ծրագիրը հնարավորություն է տվել նորովի ներկայացնել ազգային մշակույթը՝ համադրելով ավանդույթն ու ժամանակակից մոտեցումները։
Նախագծի շրջանակում ձեռք բերված տարազներն առանձնանում են իրենց խորհրդանշական նշանակությամբ։ Դրանց նախշազարդումները ոգեշնչված են Տավուշի գորգարվեստի ավանդույթներից՝ արտացոլելով մարզին բնորոշ զարդանախշերը, գունային լուծումներն ու մշակութային ինքնատիպությունը։ Այս կերպ ազգային պարի միջոցով ներկայացվում է ոչ միայն հայկական պարարվեստը, այլև Տավուշի հարուստ կիրառական արվեստն ու մշակութային ժառանգությունը։
Ազգային պար, տավուշյան նախշեր և մշակութային ինքնության պահպանման գաղափար։ Մշակութային ժառանգությունը պահպանելու լավագույն միջոցն այն երիտասարդներին փոխանցելն է, որպեսզի հայկական ավանդույթները շարունակեն ապրել ու զարգանալ նաև ապագա սերունդների համար։
