Բերդ համայնքից ավագ սերնդի մի խումբ մարդիկ երկու հագեցած օր են անցկացրել բնության գրկում՝ Գանձաքար-Իծաքար ճանապարհի Վարագաջուր գետի ափին՝ տեղացիներիս առավել հայտնի Աղսվի հանդամասում։ Այստեղ նրանց միավորել էր «Տարիքը սահման չէ՝ հանուն ակտիվ ու հավասար մասնակցության» նախագիծը։ Մասնակիցներից ավագը 94-ամյա Աշոտ պապն է, ով եկել է վայելելու հայրենի շրջանի բնությունն ու կիսվելու տարիների աշխատանքային փորձով։
Նախաձեռնության հիմքում 5 հոգանոց թիմ է՝ երեք տեղացի և Արցախից տեղահանված երկու անդամներով։ Ծրագրի իրականացմանը միացել են նաև բազմաթիվ տեղացի գործընկերներ ու համայնքի բնակիչներ, որոնք իրենց աջակցությունն են բերել տարբեր փուլերում։ Իսկ նրանք, ովքեր ցանկացել են լիարժեք մասնակցել երկօրյա ծրագրին, մնացել են վրաններում՝ հենց բնության գրկում։
Երկօրյա ծրագրին մասնակցում էին տարբեր մասնագիտությունների տեր մարդիկ, ովքեր արդեն վաստակած հանգստի են անցել։ Նրանց կողքին էին նաև Արցախից տեղահանված և Բերդ համայնքում բնակություն հաստատած մարդիկ։ Տավուշյան նազուկը՝ նույն ինքը սալին, և արցախյան ժենգյալով հացը դարձան այս նախագծի յուրահատուկ համն ու հոտը։
Ավագ սերնդի համար կազմակերպված երկօրյա ծրագրի ընթացքում մասնակիցներն ունեցան ֆինանսական գրագիտության ժամ, կիսվեցին իրենց կյանքի ու աշխատանքային փորձով, մասնակցեցին «Իմ մանկության հիշողությունները» խորագրով արտթերապիայի, հոգեբանական խմբային ակտիվությունների և մշակութային ժամի։ Ծրագրի շրջանակում այցելեցին նաև Վարագավանք և Նարդոսի այգիներ։
Տարբեր մարդիկ ու կյանքի տարբեր պատմություններ, որոնք երկու օր շարունակ տեղ ունեին՝ մարդկանց զրույցներում, հիշողություններում, համատեղ աշխատանքներում ու պարզապես միասին անցկացրած ժամանակում։ Երբ կա ցանկություն՝ ակտիվ կյանքն ու մասնակցությունը տարիք չեն հարցնում։
