Ձեզ հետ ու Ձեզ համար Տավուշ հեռուստաընկերությունն աշխատում է արդեն ուղիղ 5 տարի:
Մեզ շնորհավորում են մեր հետևորդներն ու բարեկամները: Շնորհակալ ենք մեզ սիրելու, աջակցելու, ոգևորելու և մեր կողքին լինելու համար թե՛ մեր բոլոր բարեկամներին ու գործընկերներին, և թե՛ ձեզ, մեր սիրելի՛ հեռուստադիտողներ։
—
ԵՊՀ Իջևանի մասնաճյուղի շնորհավորանքը․
«ԵՊՀ Իջևանի մասնաճյուղի տնօրենության և ողջ անձնակազմի անունից ջերմորեն շնորհավորում ենք բոլորիս կողմից սիրված և վստահելի «Տավուշ» հեռուստաընկերության 5-րդ տարեդարձը՝ ցանկանալով ստեղծագործական հետաքրքիր մտահղացումներով և նախաձեռնություններով, շարունակական վերելքներով լի երկար տարիների անխափան գործունեություն:
«Տավուշ» հեռուստաընկերությունը, հիրավի, ոչ միայն մարզի բնակչության համար տեղեկատվության ստացման հիմնական աղբյուրն է, այլև ազգային և համամարդկային արժեքների, մեր անվտանգության, լեզվի, ավանդույթների և մշակութային ժառանգության պահպանման ջատագովը և տարածողը ինչպես մարզում, այնպես էլ մարզից դուրս:
Եվս մեկ անգամ շնորհավորում, շնորհակալություն ենք հայտնում «Տավուշ» հեռուստաընկերության ողջ անձնակազմին և մաղթում ամենայն բարիք»,- նշված է շնորհավորական նամակում։
—
Նոյեմբերյանի Մշակույթի կենտրոնի շնորհավորանքը․
«Շնորհավորում ենք մեր լավագույն բարեկամ և գործընկեր Տավուշ Մեդիայի ծննդյան 5-րդ տարեդարձը: Մեր բարեկամության արդյունքում ստեղծվել և հրապարակվել են բազմաթիվ նյութեր Նոյեմբերյան համայնքի մասին:
Շնորհակալ ենք այս շարունակական գործընկերության համար. այն պարտավորեցնող է և ոգևորող:
Հատուկ շնորհակալություն հարգելի Նիկոլայ Գրիգորյանին՝ մեզ այս գեղեցիկ հնարավորությունը ընձեռելու համար:
Շնորհավո´ր, սիրելի Տավուշ հեռուստաընկերություն, անխափան եթեր և կանաչ ճանապարհ»-, նշված է Նոյեմբերյանի Մշակույթի կենտրոնի տնօրինության նամակում:
—
«Հույսի կամուրջ» ՀԿ շնորհավորանքը
«Սրտանց շնորհավորում ենք Տավուշ հեռուստաընկերությանը՝ hիմնադրման հինգերորդ տարեդարձի կապակցությամբ։
Մեր գործընկերային հարաբերությունները մշտապես նշանավորվել են փոխադարձ հարգանքով, համագործակցության պատրաստակամությամբ և ընդհանուր արժեքներով՝ ի նպաստ համայնքային զարգացման և հանրային իրազեկվածության բարձրացման։
Թող ձեր առաքելությունը շարունակի ազդել հասարակական գիտակցության ձևավորման վրա՝ փոխանցելով ճշգրիտ, բովանդակալից և անկողմնակալ տեղեկատվություն։
Շնորհակալ ենք արդյունավետ համագործակցության և բարեկամության համար։ Շարունակեք լուսավորել մեր Տավուշն ու ողջ Հայաստանը՝ հավատարիմ մնալով ձեր առաքելությանը»-, նշված է շնորհավորական նամակում:
—
Կողբի Բագրատ Սահակյանի անվան միջնակարգ դպրոցի (երկրորդ դպրոց) շնորհավորանքը
«Շնորհավորում ենք Տավուշ հեռուստաընկերության համակազմին տարեդարձի կապակցությամբ, մաղթում ենք բուռն ու բազմաբովանդակ հետաքրքրություններով լի աշխատանք, անխափան եթերներ:
Հուսով ենք մեր բարեկամական և աշխատանքային համագործակցությունը կշարունակվի և կծառայի մեր ժողովրդին, մեր հայրենիքին, գալիք սերունդներին:
Բարի երթ ձեր շնորհալի գործին»
—
«Դիլի տուր Ինֆո» զբոսաշրջային, մշակութային և տեղեկատվական բլոգի հիմնադիր Վաչե Գրիգորյանը շնորհավորում է Տավուշ հեռուստաընկերության հիմնադրման 5-րդ տարեդարձը
«Սիրելի «Տավուշ» հեռուստաընկերության հետևորդներ, հեռուստադիտողներ, ես ևս միանում եմ բոլոր շնորհավորանքներին, բարեմաղթանքներին և մաղթում ամենակարևորը անխափան եթեր, երկար-երկար աշխատանքային կանաչ ճանապարհ։ Ուզում եմ խորին շնորհակալություն հայտնել «Տավուշ» հեռուստաընկերության ստեղծագործական խմբին ակտիվ համագործակցելու, իմ գործունեությունս ճիշտ և գրագետ լուսաբանելու համար։ Հիանում եմ մեր մարզային հեռուստաընկերության բարձրակարգ և արագ աշխատանքով, խնդիրներն արագ և օբյեկտիվ լուսաբանելու պրոֆեսիոնալ տեսանկյունից ներկայացնելու մոտեցմամբ։ Սիրում եմ բոլորիդ և ուզում եմ, որ նշենք մեր հեռուստաընկերության 100-ամյակը, բայց նույն ստեղծագործական թիմի ու հետևորդների հետ միասին։ Թող ոչ ոք չպակասեն։ Սրտաբուխ շնորհավորանքներով՝ Ձեր հավատարիմ հեռուստադիտող, ընկեր և բարեկամ՝ Վաչե»
—
«Կանաչ Գյուղ ընկերության» շնորհավորանքը
«Կանաչ Գյուղ ընկերության» շնորհավորում է Տավուշ հեռուստաընկերության 5-ամյակը:
Մարզային հեռուստաընկերությունը, միայն հեռուստաընկերություն չէ, այն հնարավորություն է մեր սահմանամերձ մարզի խնդիրները լուսաբանելու, լուծման հնարավոր տարբերակներ գտնելու: Շնորհավորում ենք Տավուշ Մեդիային, ընդգծում հեռուսատաընկերության դերն ու նշանակությունը մարզային կյանքում: Շնորհավում եմ նաև մեզ, բոլորիս Տավուշի բնակիչներին և Տավուշ Մեդիայի ստեղծագործական թիմին: Շնորհակալություն ձեր անձնվեր և հետաքրքիր աշխատանքի համար: Մաղթում եմ նոր , հետաքրքիր նախագծեր: Միշտ միասին, միշտ առաջ:»
—
Վարդուհի Պողոսյան, Տավուշի մարզի, Տավուշ գյուղի բնակիչ
«Ամենադիտվող և բազմաբովանդակ հաղորդումներով հագեցած #ՏավուշՀԸ/TavushTV … Շնորհակալություն ,որ դուք կաք։ Շնորհավորում ենք ողջ անձնակազմին`առանձին անուններ չնշելով»
—
Բերդի մշակույթի կենտրոնի շնորհավորանքը
«Այսօր մեր բարեկամը՝ Բերդի մշակույթի կենտրոնի պաշտոնական գործընկերը՝ Տավուշ հեռուստաընկերությունը, դարձավ 5 տարեկան։
Հինգ դժվարին տարիներ մեր երկրի համար՝ համավարակ, պատերազմներ և բազմաթիվ այլ խնդիրներ։
Ահա նման ծանր ժամանակաշրջանում հիմնադրվեց և պատվով գործեց Տավուշ հեռուստաընկերությունը՝
հեռուստաընկերություն, որը մշտապես ուշադրության կենտրոնում պահեց նաև մշակութային դաշտը։
Բերդի տարածաշրջանում բարձր մակարդակով լուսաբանվեցին հինգ տասնյակից ավելի մասշտաբային միջոցառումներ և փառատոններ, կազմակերպեց մշակույթին նվիրված հաղորդաշարեր ու քննարկումներ։
Խորին երախտագիտությամբ մեր շնորհակալությունն ու շնորհավորանքն ենք ուղղում հեռուստաընկերության ողջ անձնակազմին՝ ի դեմս հիմնադիր, Տավուշ Մեդիայի խորհրդի նախագահ Նիկոլայ Գրիգորյանի։
Թող ձեր եթերները հավերժ բարի լուր ավետեն»,- նշված է շնորհավորանքում։
—
Վերին Կարմիրաղբյուր գյուղի միջնակարգ դպրոցի շնորհավորանքը
«Երախտիքի ամենաջերմ մաղթանքներով ասում ենք Ձեզ շնորհավո՜ր․ , շնորհավոր, քանզի Ձեր ամեն մի եթերը ուսանելի մի պատմություն է, մի ավարտուն կամ չավարտված, հորիզոնում թռիչք գտած, թևավորված կենսագրություն է: Ամեն եթեր խոսուն մի բառ ՝ հազարերանգ խոսուն մտքեր ծրարված, թախծոտ դեմքեր, ժպտուն աչքեր։ Հեռուն կապող Ձեր քայլերին կրկին ասում ենք մենք ՝ տարեդարձդ շնորհավո՜ր․․․»-, նշված է Վերին Կարմիրաղբյուրի դպրոցի նամակում:
—
Բարեկամավան գյուղի միջնակարգ դպրոցի շնորհավորանքը
«Շնորհավոր 5-ամյակդ, Տավուշ հեռուստաընկերություն։
Ուրախ ենք, որ արդեն հինգ տարի ներկայացնում եք մեր մարզը՝ լուսաբանելով ամենակարևորն ու մտահոգիչը, սփռելով կրթական, մշակութային և հայրենասիրական արժեքներ։ Ցանկանում ենք Ձեզ բեղմնավոր աշխատանք, նոր ստեղծագործական հաղթանակներ, հավատարիմ հեռուստադիտողներ և անսահման եռանդ՝ տեղեկատվության այս արագահոս դարաշրջանում վստահելի աղբյուր մնալու գործում։
Թող ձեր ալիքը միշտ լցված լինի լույսով, իմաստով ու Տավուշյան ուժով։ Հաճույքով հետևում ենք ու շարունակելու ենք լինել ձեր կողքին»
—
Նոյեմբերյան համայնքից Կարինե Ալեքսանյանի շնորհավորանքը
«Շնորհավորում ենք, սիրելի Տավուշ Մեդիա, մաղթում ենք գեղեցիկ և ոգեշնչող իրադարձություններով հագեցած անխափան եթեր…
Տավուշ հեռուստաընկերությունը օգնեց մեզ ճանաչել մեր իսկ մարզի և բնակավայրի մարդկանց` սկսած հողագործությամբ ու անասնապահությամբ զբաղվող գյուղի բնակիչներից, մինչև գիտության, մշակույթի, բիզնեսի և այլ ոլորտների ներկայացուցիչների… Ինչպես նաև, Տավուշն ավելի ճանաչելի դարձրեց մեր հայրենիքում և աշխարհում։
Գնահատում ենք ձեր կարևոր և որակյալ աշխատանքը և մաղթում մե՜ծ հաջողություններ…»
—
Մեր հեռուստադիտող Արմենուհի Ծատուրյանի շնորհավորանքը․
«Շնորհավորում եմ, ստեղծագործեք, արարեք, Ձեր բովանդակալից հաղորդումներով հարստացրեք մեր ժողովրդի կյանքը։ Մեծացրեք հաղորդումների աշխարհագրությունը,հայտնաբերեք բոլոր բնագավառների տաղանդավոր մարդկանց։ Շնորհավորում եմ և շնորհակալ եմ պարոն Նիկոլայ Գրիգորյանին և ողջ ստեղծագործական խմբին»
