Հուլիսի 8-ին Բուլղարիայում անցկացվել է Կիոկուշին կարատեի KWU վարկածով Աշխարհի գավաթի խաղարկությունը, որը համախմբել էր տարբեր երկրների տասնյակ մարզիկների։ Հայաստանը մրցաշարին մասնակցել է երեք ֆեդերացիաների համատեղ հավաքականներով։
Մեր երկրի հավաքականները միասին նվաճել են 11 մեդալ, որոնցից 10-ը՝ Կիոկուշին կարատեի ազգային ֆեդերացիայի (KWF) մարզիկների շնորհիվ։
Հաղթողների թվում են նաև Տավուշի մարզի պատանիները։ Նոյեմբերյան համայնքի Բագրատաշեն գյուղից Գոռ Կիրակոսյանը դարձել է աշխարհի գավաթակիր 14-15 տարիքային խմբում՝ 60 կգ քաշային կարգում։ Բացի այդ, նա պարգևատրվել է «Լավագույն տեխնիկայի» համար հատուկ գավաթով։
Դեբեդավան գյուղից Արեն Խուդյանը 16-17 տարիքային խմբում (55 կգ) գրավել է երկրորդ տեղը՝ արժանանալով արծաթե մեդալի։ Գառնիկ Աղեկյանը (14-15 տ․, 50 կգ) դարձել է բրոնզե մրցանակակիր։
