«Ոչ մի անգամ չի ասել՝ իրանց մոտ ինչ ա կատարվում․ մենակ ասում էր՝ ոչ մի բան մեզ մոտ չկա, կոֆե ենք խմում․․․» (պատմում են Գառնիկ Հովակիմյանի մայրը):
«Տղերքը» հաղորդաշարի մեր այսօրվա հերոսը Գառնիկ Հովակիմյանն է։ Պատասխանատու աշակերտ, հարեհաս ընկեր, կողքինին հասնող ու օգնող մարդ՝ մշտապես նեցուկ իր ընտանիքին ու հարազատներին․ հենց այսպիսինը նա կմնա իրեն ճանաչելու բախտն ունեցած մարդկանց սրտերում։
Գառնիկ Հովակիմյանը ծնվել է 2001 թ․ մարտի 15-ին։ 2007 թ․ ընդունվել է Հովքի միջնակարգ դպրոց և ավարտել այն 2019 թ․։ Նույն թվականին ընդունվել է ԵՊՀ ԻՄ Դիզայնի և կիրառական արվեստի ֆակուլտետ։
Հայոց բանակ է զորակոչվել 2019 թ․ հունիսի 26-ին։ Ծառայել է Արցախի Հանրապետության «Մարտունի-2» պաշտպանական զորամասում։ Ծառայության ընթացքում բարձր պատասխանատվության համար արժանացել է շնորհակալագրի և պարգևատրվել է ժամացույցով։
Մարտի դաշտում ցուցաբերած քաջության համար Գառնիկ Հովակիմյանը հետմահու պարգևատրվել է «Արիության համար» և «Գթության մայր» մեդալներով։
Գառնիկի ընտրությունն ու որոշումն էր՝ նվիրվել մինչև վերջ, կռվել մինչև վերջ, փրկել մարտական ընկերոջ կյանքը՝ Հայրենիքին նվիրելով ամենը, ինչ ուներ։
Ինչպես հարազատ դպրոցում հավաստում են նրա ուսուցիչները՝ մնում է մեր պարտքը՝ հիշել նրան ու նրա հերոսությամբ դաստիարակել ապագա սերունդներին․․․
