1991 թվականին Հայաստանի Հանրապետության քաղաքացիներն «այո» ասացին անկախությանը։ Այս տարի լրանում է անկախության 35-ամյակը։ Ինչպես ամեն տարի, այս տարի ևս սահմանամերձ Բերդավանում Անկախության տոնը նշվեց առանձնահատուկ կարևորությամբ։ Տոնական միջոցառումը համախմբել էր գյուղի բնակիչներին ու հյուրերին։
Տոնական օրվա մշակութային ծրագրում իր կատարումներով հանդես եկավ «Նաիրյան» վոկալ անսամբլը։ Կատարողները բեմ բարձրացան հայկական ավանդական երգերի ծրագրով՝ ազգային երգն ու մշակույթը ներկայացնելով հանդիսատեսին։ Անկախությունը մեր նվիրական արժեքն է և յուրաքանչյուրիս պատասխանատվությունը։ Այս հարցում նոյեմբերյանցիների դիրքորոշումը միանշանակ է՝ պահպանել ու արժևորել անկախությունը, որի համար սերունդներ են պայքարել։
Բերդավանի գեղագիտական կենտրոնում պետական և ազգային տոները մշտապես առանձնահատուկ շուքով են նշվում։ Սահմանամերձ այս գյուղում հայրենասիրության շունչը զգացվում է ամենուր՝ դպրոցում, մանկապարտեզում, մշակութային կենտրոնում։ Գեղագիտական կենտրոնում ոչ մի առիթ բաց չեն թողնում՝ խոսքով ու երգով, երաժշտությամբ ու արվեստով գովերգելու հայրենի եզերքը, նրա պատմությունն ու արժեքները, հողը, որի համար պայքարել ու կռվել են բազմաթիվ հայորդիներ։
Անկախությունն արժեք է, որի իրական նշանակությունն առավել տեսանելի է սահմանամերձ բնակավայրերում, որտեղ մեր երկրի սահմանը առօրյա կյանքի անբաժան մասն է։ Բերդավանում Անկախության 35-ամյակը ևս մի առիթ էր՝ վերարժևորելու անցած ճանապարհը, հիշելու այդ ճանապարհը կերտած մարդկանց ու գիտակցելու, որ անկախության պահպանումն ու սերունդներին փոխանցելը յուրաքանչյուրիս պատասխանատվությունն է։
