Համայնքային ոստիկանության Դիլիջանի բաժնում նոյեմբերի 28-ին հաղորդում տված կինը հայտնել էր, որ Աթարբեկյան փողոցի իր տնից գողություն է կատարվել: Մեկնած ոստիկանները պարզել են, որ պատուհանի ցանցը պոկել, մտել էին տուն և գողացել 2000 դոլար, 200 հազար ռուբլի, 1 միլիոն 600 հազար դրամ և ոսկյա զարդեր: Իրացնելով Քրեական ոստիկանության Տավուշի մարզային վարչությունում ստացված օպերատիվ տվյալները և ձեռնարկելով օպերատիվ-հետախուզական միջոցառումներ՝ նույն օրը Դիլիջանի բաժին է ներկայացվել տանտիրոջ 27-ամյա որդին: Բացատրական աշխատանքի արդյունքում նա խոստովանել է, որ նշված գողությունը կատարել է ինքը: Կազմված փաստաթղթերը և երիտասարդը ներկայացվել են Դիլիջանի քննչական բաժին:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
