Դիլիջանում գործող արտադրամասում կասեցվել է տանձի և թարխունի համերով գազավորված ոչ ալկոհոլային ըմպելիքների արտադրությունը։ Այս մասին հայտնում է Սննդամթերքի անվտանգության տեսչական մարմինը։
Տեսչական մարմնի փոխանցմամբ՝ Տավուշի մարզի Դիլիջան քաղաքի Կալինինի 3/16 հասցեում գործող՝ անհատ ձեռնարկատեր Յուլյա Վարդանյանին պատկանող արտադրամասում իրականացված զննման շրջանակում վերցված նմուշներն ուղարկվել են լաբորատոր փորձաքննության։
Փորձաքննության արդյունքներով՝ «Գազավորված ոչ ալկոհոլային ըմպելիք թարխունի համով» և «Գազավորված ոչ ալկոհոլային ըմպելիք տանձի համով» արտադրատեսակների նմուշները չեն համապատասխանել «ՄԱՄՔ» և «Խմոր/բորբ (գումարային)» ցուցանիշներով սահմանված պահանջներին։ Ըստ տեսչական մարմնի՝ արձանագրված արդյունքները չեն համապատասխանել սննդամթերքի անվտանգության և հիգիենայի ոլորտում գործող իրավական ակտերի պահանջներին։ Տեսչական մարմնի ղեկավարի որոշմամբ՝ երկու արտադրատեսակների արտադրությունը կասեցվել է մինչև հայտնաբերված խախտումների վերացումը։
