Հայաստանում արդեն իններորդ տարին անցկացվող Մեդիագրագիտության շաբաթն այս տարի նոյեմբերի 14-21-ը նշվում է «Դիմակայելու արվեստը» խորագրի ներքո։ Շաբաթվա շրջանակում Տավուշ Մեդիան հյուրընկալել է Իջևանի թիվ 3 դպրոցի մի խումբ աշակերտների՝ նրանց հնարավորություն տալով ծանոթանալու մեդիայի աշխատանքին, հեռուստատեսային արտադրանքի ստեղծման առանձնահատկություններին և տեղեկատվության ստուգման մեխանիզմներին։
Այցի ընթացքում քննարկվել են սոցիալական մեդիայի անվտանգ և նպատակային օգտագործման, կեղծ լուրերի բացահայտման ու ստուգման, ինչպես նաև ապատեղեկատվությունից պաշտպանվելու կարևոր հարցեր։ Արհեստական բանականության արագ զարգացման պայմաններում մեդիագրագիտությունը ձեռք է բերում առավել մեծ նշանակություն՝ օգնելով մարդկանց քննադատաբար գնահատել տեղեկատվությունը, տարբերակել հավաստի աղբյուրները և հետևել մեդիա հիգիենայի սկզբունքներին։
Տավուշ Մեդիայի աշխատակիցները դպրոցականներին ներկայացրել են հեռուստատեսային արտադրանքի ստեղծման ամբողջ ընթացքը՝ հաղորդումների պատրաստումից և նկարահանումից մինչև մոնտաժ ու եթեր հեռարձակում։ Աշակերտները ծանոթացել են նաև տաղավարային հաղորդումների պատրաստման ձևաչափին և հեռուստաընկերության առօրյա աշխատանքին։ Հանդիպումն անցել է երկխոսության և մտքերի փոխանակման ձևաչափով։ Դպրոցականները ներկայացրել են իրենց առաջարկներն ու գաղափարները՝ կիսվելով, թե ինչ թեմաներով և ինչպիսի հաղորդումներ կցանկանային տեսնել Տավուշ հեռուստաընկերության եթերում։
Տավուշ Մեդիան կարևորում է մեդիագրագիտության տարածումը և կրթական հաստատությունների հետ համագործակցությունը՝ նպաստելով տեղեկացված, քննադատական մտածողությամբ և մեդիամիջավայրում կողմնորոշվելու հմտություններ ունեցող սերնդի ձևավորմանը։ Մեդիագրագիտության շաբաթվա առիթով Տավուշ Մեդիան հրավիրում է դպրոցներին, մանկապարտեզներին, բուհերին, գրադարաններին, կրթական ու մշակութային կենտրոններին և բոլոր հետաքրքրված կառույցներին օգտվելու իր կողմից մշակված Մեդիագրագիտության շտեմարանից։
Շտեմարանում ներկայացված են թեմատիկ հաղորդումներ և տեսանյութեր, ուղեցույցներ, ուսումնական նյութեր, խաղեր և մեդիագրագիտության ուսուցմանն ու տարածմանն ուղղված այլ գործիքներ։
Շտեմարանին կարող եք ծանոթանալ այստեղ:
