Հոկտեմբերի 25-ին կայանալիք տեղական ինքնակառավարման մարմինների ընտրություններին ընդառաջ՝ Տավուշ Մեդիայի տաղավարում անցկացվեց հեռուստաբանավեճ՝ Դիլիջան համայնքի ավագանու ընտրություններին մասնակցող քաղաքական ուժերի ընտրական ցուցակների առաջին համարների մասնակցությամբ։ Հեռուստաբանավեճի նպատակն էր ընտրողներին հնարավորություն տալ ծանոթանալու քաղաքական ուժերի ծրագրերին, համայնքի զարգացման վերաբերյալ նրանց պատկերացումներին, առաջարկվող լուծումներին և առաջնահերթություններին։
Մասնակցել են Դիլիջան համայնքում «Ապրելու երկիր» կուսակցության համայնքապետի թեկնածու Վարդան Ավագյանը և «Հանրապետություն» կուսակցության համայնքապետի թեկնածու Նունե Սանթրոսյանը։ «Քաղաքացիական պայմանագիր» կուսակցության ընտրական ցուցակի առաջին համարը՝ Դավիթ Սարգսյանը, ավելի վաղ գրավոր հաստատել էր մասնակցությունը, սակայն չի մասնակցել ուղիղ եթերում նախատեսված հեռուստաբանավեճին։
Նախընտրական քննարկման ընթացքում անդրադարձ կատարվեց Դիլիջան համայնքի բնակիչներին հուզող մի շարք կարևոր հարցերի։ Մասնավորապես՝ քննարկվել են քաղաքաշինության, ճանապարհների և ենթակառուցվածքների բարելավման, փողոցների լուսավորության, ջրամատակարարման, աղբահանության և կոմունալ ծառայությունների կազմակերպման խնդիրները։
Առանձին անդրադարձ կատարվեց բնապահպանությանը և կայուն զարգացմանը՝ հաշվի առնելով Դիլիջանի բնական միջավայրի պահպանության ու զբոսաշրջային ներուժի արդյունավետ օգտագործման կարևորությունը։ Մասնակիցները խոսեցին նաև կրթության, սպորտի, մշակույթի, երիտասարդների՝ համայնքային կառավարմանը մասնակցության, զբոսաշրջության զարգացման, տեղական տնտեսության խթանման և գյուղական բնակավայրերի խնդիրների մասին։
Քննարկման օրակարգում ընդգրկվել են նաև համայնքի դիմակայունության և անվտանգության հարցերը, արտակարգ իրավիճակներին պատրաստվածությունը, ինչպես նաև համայնքային կառույցների, համապատասխան ծառայությունների և բնակիչների համագործակցությունը։
Ուղիղ եթերի ընթացքում հնչեցին նաև հեռուստադիտողների հարցերը։ Մասնավորապես՝ քննարկվեցին Իջևան–Դիլիջան, Դիլիջան-Վանաձոր տրանսպորտային կապի բարելավման և Հաղարծինում ու հարակից բնակավայրերում աղբահանության ու շրջակա միջավայրի պահպանության խնդիրները։
Մասնակիցները հնարավորություն ունեցան ներկայացնելու իրենց դիրքորոշումները, պատասխանելու հարցերին և հարցեր ուղղելու միմյանց՝ Դիլիջան համայնքի կառավարմանն ու զարգացմանը վերաբերող թեմաներով։ Քննարկումն անցկացվեց փոխադարձ հարգանքի, հավասար պայմանների, խոսքի ազատության և բովանդակային երկխոսության սկզբունքներով։
Տավուշ Մեդիան նախընտրական շրջանում շարունակում է իրականացնել իրազեկման և լուսաբանման աշխատանքներ՝ հանրությանը ներկայացնելով քաղաքական ուժերի գործունեությունը, նրանց առաջարկներն ու բնակիչների ակնկալիքները։ Հեռուստաբանավեճը ընտրողներին հնարավորություն է տվել համադրելու քաղաքական ուժերի մոտեցումները և ավելի տեղեկացված որոշում կայացնելու Դիլիջան համայնքի ապագայի վերաբերյալ։
Հիշեցնենք, որ Դիլիջան համայնքի ավագանու ընտրությունները տեղի կունենան հոկտեմբերի 25-ին։
