Տավուշի երիտասարդների առջև ծառացած արդի մարտահրավերները և նրանց տրվող հնարավորությունները ուսումնասիրել և հանրությանն է ներկայացրել Քաղաքացիական երիտասարդական կենտրոնը։ «Տավուշի մարզի երիտասարդների աշխատանքային իրավունքները. արդի մարտահրավերներն ու հնարավորությունները» մոնիտորինգային զեկույցի արդյունքները օգոստոսի 7-ին ներկայացվեց քաղհասարակության, պետական, տեղական իշխանությունների, երիտասարդության և շահագրգիռ այլ շերտերի քննարկմանը:
Քաղաքացիական երիտասարդական կենտրոն համայնքային զարգացման ՀԿ-ը՝ «Երիտասարդները՝ հանուն հավասար աշխատանքային իրավունքների» ծրագրի շրջանակում ընթացիկ տարում իրականացրել է երիտասարդների աշխատանքային իրավունքների և դրանց պաշտպանության մեխանիզմների արդյունավետության գնահատման մոնիտորինգը:
Հետազոտության ուսումնասիրության առարկա են հանդիսացել հետեւյալ խնդիրները՝ Տավուշի մարզի աշխատաշուկայի առանձնահատկությունները, մասնագիտական կրթության և աշխատաշուկայի միջև կապը, երիտասարդների աշխատանքային իրավունքների հիմնական խախտումները, դրանց տեսակներն ու պատճառները, աշխատանքային իրավունքների պաշտպանության պետական մեխանիզմները և դրանց արդյունավետությունը,
աշխատանքային իրավունքների պաշտանությունը ճգնաժամային իրավիճակներում, աշխատանքային իրավունքների իրացման ընթացքում տեղի ունեցող խտրականության դրսևորումները, դրանց պատճառներն ու հետևանքները։
Հանդիպմանը քննարկվեց աշխատանքային իրավունքների խնդիրները, հնչեց առաջարկներ՝ ոլորտի կարգավորման հնարավոր տարբերակների ձևակերպման համար։ «Երիտասարդները՝ հանուն հավասար աշխատանքային իրավունքների» նախագիծը իրականացվել է Քաղաքացիական երիտասարդական կենտրոնի կողմից Եվրոպական միության ֆինանսական աջակցությամբ իրականացվող «Հանուն աշխատանքի, հաշվետու եւ ներառական աշխատաշուկայի նախաձեռնություն» ծրագրի շրջանակում։
