Օգոստոսի 31-ին տեղեկություն տարածվեց, որ ձերբակալվել է Նոյեմբերյան համայնքի ղեկավար Արսեն Աղաբաբյանը։ Հակակոռուպցիոն կոմիտեից Տավուշ Մեդիային հայտնել էին, որ քննվող քրեական վարույթի շրջանակում օգոստոսի 31-ին ձերբակալվել է Նոյեմբերյան համայնքի ղեկավար Արսեն Աղաբաբյանը։
Ավելի ուշ հայտնի դարձավ, որ Աղաբաբյանը հարցաքննությունից հետո ազատ է արձակվել՝ երկրից բացակայելու արգելքով։ Այսօր՝ սեպտեմբերի 1-ին, Արսեն Աղաբաբյանը ֆեյսբուքյան էջում հրապարակում է տարածել Նոյեմբերյան համայնքի և միջազգային կառույցների միջև նոր համագործակցության մասին։
Հրապարակման համաձայն՝ Copernicus Berlin, Copernicus Yerevan և Նոյեմբերյանի համայնքապետարանը համագործակցության հուշագիր են ստորագրել։
«Ուրախ ենք տեղեկացնել, որ Copernicus Berlin-ը, Copernicus Yerevan-ը և Նոյեմբերյանի համայնքապետարանը համագործակցության հուշագիր են ստորագրել։ Այս համագործակցությունը կօգնի նոր հնարավորություններ ստեղծել խոշոր քաղաքներից դուրս բնակվող մարդկանց համար։ Միասին մենք ցանկանում ենք աջակցել նոր նախագծերի իրականացմանը և ավելի շատ մարդկանց հնարավորություն տալ մասնակցելու մեր կրթաթոշակային ծրագրերին, պրակտիկաներին և վերապատրաստումներին։ Մենք ոգևորված ենք այս համագործակցության մեկնարկով և շուտով ձեզ հետ կկիսվենք նորություններով», — նշված է հայտարարության մեջ։
