Կենսաբազմազանությունն անտառի հարստությունն է, իսկ դրա պահպանումը՝ անտառների երկարաժամկետ դիմակայունության հիմքը։
Տավուշի մարզը Հայաստանի ամենականաչ ու բնությամբ հարուստ անկյուններից է։ Այստեղ է գտնվում հանրապետության անտառային ֆոնդի շուրջ կեսը, որն աչքի է ընկնում իր բացառիկ էկոհամակարգերով, հնագույն ծառատեսակներով և բուսական ու կենդանական աշխարհի հարուստ տեսականիով։
Բուսական աշխարհի հարստությունը
Տավուշի անտառները հիմնականում խառը տիպի են, որտեղ գերիշխում են լայնատերև ծառատեսակները՝ հաճարենին և կաղնին։ Անտառային գոտիներում լայնորեն տարածված են նաև վայրի պտղատու ծառերն ու թփերը՝ տանձենին, խնձորենին, հոնը և տարատեսակ հատապտուղները, որոնք կենսական նշանակություն ունեն տեղի կենդանական աշխարհի համար։
Կենդանական աշխարհի բազմազանությունը
Խիտ անտառներն ու անառիկ լեռնալանջերը ապաստարան են ապահովում հարյուրավոր կենդանատեսակների համար․
- Կաթնասուններ․ անտառներում հանդիպում են գորշ արջ, եղջերու, այծյամ, վարազ, գայլ, աղվես և լուսան։
- Թռչուններ․ Տավուշի էկոհամակարգը դրախտ է թռչունների համար․ այստեղ բնադրում են արծիվը, բազեն, անտառային բուն, կաքավն ու տարատեսակ փայտփորները։
- Սողուններ և երկկեցաղներ․ մարզը հարուստ է նաև մողեսների, օձերի և ջրային էկոհամակարգերում ապրող տեսակներով։
Դիմակայունություն և պահպանություն
Հարուստ տեսականիով օժտված անտառն ավելի դիմակայուն է կլիմայական փոփոխությունների, հիվանդությունների և վնասատուների տարածման պայմաններում։ Տավուշի անտառները կարգավորում են տարածաշրջանի կլիման, ապահովում են մաքուր օդ և կանխում հողերի էրոզիան ու սահանքները։
Այսօր առաջնահերթ խնդիր է անտառների պաշտպանությունը ապօրինի հատումներից, հրդեհներից և անհեռատես միջամտություններից։
Անտառն ազգային հարստություն է․ պաշտպանենք, խնամենք ու հարստացնենք՝ կայուն կառավարենք մեր անտառները։ Անտառը ոչ միայն փայտանյութ է ու խնջույքի վայր, այլ, առաջին հերթին՝ հարստության ու բարիքի շտեմարան, երկրի առողջ շնչառության գրավական։
Հիշե՛ք, անտառն ազգային անվտանգության՝ բնապահպանական, տնտեսական, պարենային, էներգետիկ, սոցիալական և կենսանվտագության, աղետների ռիսկի կառավարման, կլիմայի փոփոխության հարմարվողականության, կենսաբազմազանության պահպանման, հանրային առողջության, երկրի կայուն զարգացման, նաև՝ քաղաքացիական պաշտպանության, կենսական բաղադրիչն է։
Կարդացեք նաև՝
