ՀՀ շրջակա միջավայրի նախարարության էկոպարեկային ծառայության պետ Վլադիմիր Կիրակոսյանի գլխավորած աշխատանքային խումբն այց է կատարել Տավուշի մարզ՝ մի շարք հանդիպումներ անցկացնելու նպատակով։
Այցի մեկնարկին Տավուշի մարզպետարանում Վլադիմիր Կիրակոսյանը հանդիպել է Տավուշի մարզպետի հետ։ Կողմերը կարևորել են պարբերական համագործակցության շարունակականությունը և ընդգծել են Տավուշի անտառային ռեսուրսների առանձնահատուկ նշանակությունը՝ Հայաստանի անտառածածկ տարածքների զգալի մասն այստեղ է գտնվում։ Քննարկվել են մարզային կառույցների համալրման և տեխնիկական վերազինման հարցեր, ինչպես նաև բնապահպանական վերահսկողության համակարգի զարգացման նոր գործիքներ։
Աշխատանքային խմբի այցի ընթացքում Ծառայության պետը հանդիպումներ է ունեցել նաև Էկոպարեկային ծառայության Տավուշի մարզային վարչության «Դիլիջան ազգային պարկ», Իջևանի, Սևքարի և Արծվաբերդի տեղամասերի անձնակազմերի հետ։ Հանդիպումների հիմնական շեշտադրումները վերաբերել են անտառների և բնության հատուկ պահպանվող տարածքների պահպանության արդյունավետության բարձրացմանը, ապօրինությունների կանխարգելման առաջնահերթությանը, կոռուպցիայի անթույլատրելիությանը և հանրության հետ բաց հաղորդակցության կարևորմանը։
Կիրակոսյանը նշել է, որ շուրջ 700 000 հեկտարի պահպանությունը լուրջ պատասխանատվություն է պահանջում, և անհրաժեշտ է ամենօրյա հետևողական աշխատանք՝ ապագա սերունդներին առողջ բնություն և հարուստ կենսաբազմազանություն փոխանցելու համար։ Հանդիպումները տեղի են ունեցել հարց ու պատասխանի ձևաչափով, ներկայացվել են առկա խնդիրները և քննարկվել հնարավոր լուծումները։
