Տավուշի մարզում մինչև 18 տարեկան երեխաները հերթական անգամ հնարավորություն են ունեցել ստանալու անվճար բժշկական խորհրդատվություն և անհրաժեշտ բուժօգնություն։ Նախաձեռնությունն իրականացվում է «Հույսի կամուրջ» հաշմանդամություն ունեցող երեխաների և երիտասարդների իրավունքների պաշտպանության հասարակական կազմակերպության և «Ուիգմոր կանանց և երեխաների հիվանդանոց» բժշկական կենտրոնի համագործակցությամբ։ Ծրագրի շրջանակում Տավուշի մարզի երեխաները տարեկան երկու անգամ հնարավորություն են ստանում օգտվելու անվճար բժշկական ծառայություններից՝ ըստ իրենց կարիքների։
Հերթական այցը օգոստոսի 29-ին էր։ Բժիշկներն իրականացրել են զննումներ, տրամադրել մասնագիտական խորհրդատվություն, իսկ անհրաժեշտության դեպքում երեխաներին ուղղորդել հետագա հետազոտությունների և բուժման։ Բժշկական խորհրդատվություններին զուգահեռ՝ մասնագետները հանդիպեցին նաև ծնողների հետ։ Հանդիպման ընթացքում քննարկվեցին օրթոպեդիկ առողջությանը վերաբերող տարածված միֆերն ու սխալ պատկերացումները, ինչպես նաև այն հարցերը, թե որ դեպքերում է անհրաժեշտ դիմել մասնագետի, ինչ խնդիրներ կարելի է կանխարգելել վաղ հայտնաբերման միջոցով և ինչ նշանակություն ունեն երեխայի ճիշտ շարժողական ակտիվությունն ու առողջ ապրելակերպը։
«Հույսի կամուրջ» ՀԿ-ի և «Ուիգմոր կանանց և երեխաների հիվանդանոց» ԲԿ-ի երկարամյա համագործակցության նպատակը մեկն է՝ անկախ բնակության վայրից, յուրաքանչյուր երեխայի համար ապահովել անհրաժեշտ և որակյալ բժշկական ծառայությունների հասանելիություն։
