Երբեմն պատմելու համար բառեր պետք չեն․ բավական են մեկ ժեստը, հայացքն ու շարժումը։ Հենց այս լեզվով էլ Երևանի մնջախաղի պետական թատրոնը նոյեմբերի 3-ին Բերդ քաղաքում, իսկ նոյեմբերի 4-ին Արծվաբերդ գյուղում իր արվեստը ներկայացրեց տավուշեցի մանուկներին:
Բերդի մշակույթի տան հետ համագործակցությամբ երեխաներին ներկայացվեց «2+1» ներկայացումը։
Սերը, ընկերությունն ու մանկությունը ներկայացման առանցքում էին։ Մնջախաղի յուրահատուկ արտահայտչամիջոցներով պատմությունը փոխանցել է հույզեր ու արժեքներ՝ երեխաներին հնարավորություն տալով բացահայտելու թատերական աշխարհը, որտեղ լռությունն անգամ կարող է պատմել ամենակարևորի մասին:
Բերդ համայնքում կայացած ներկայացումները համայնքի մշակութային կյանքում նոր հանդիպումների սկիզբ են։ Երևանի մնջախաղի պետական թատրոնն ու Բերդի մշակույթի տունը մտադիր են շարունակել համագործակցությունը՝ նոր ներկայացումներով և նախաձեռնություններով թատերական արվեստն ավելի հասանելի դարձնելով սահմանամերձ համայնքի բնակչությանը:
Հեղինակ՝ Անահիտ Մակյան
