Առողջապահության և աշխատանքի տեսչական մարմինը Դիլիջանի թիվ 1 մանկապարտեզի տնօրենին կարգադրել է չեղյալ համարել մսուր խմբի դայակ Արևիկ Ալիխանյանին տրված նկատողությունները եւ աշխատանքից ազատելու որոշումը։
2025 թվականի հունվարի 14-ին «Հետքը» գրել էր, որ Դիլիջանի թիվ 1 մանկապարտեզի մսուր խմբի դայակ Արևիկ Ալիխանյանը օգոստոս ամսից աշխատել է առանց դաստիարակի՝ միայնակ խնամելով 20 երեխայի։ Իր իրավունքների ոտնահարման մասին բարձրաձայնելուց հետո Արևիկ Ալիխանյանը աշխատանքը կորցնելու վտանգի առաջ էր։ Հոդվածի հրապարակումից հետո Դիլիջանի համայնքապետ Դավիթ Սարգսյանը եւ նրա խորհրդական Նոնա Գրիգորյանն այցելել էին մանկապարտեզ և պահանջել դայակից ազատման դիմում գրել։ Արևիկ Ալիխանյանը չէր կատարել համայնքապետի պահանջը և շարունակել էր պայքարել իր իրավունքների պաշտպանության համար։
Արևիկ Ալիխանյանին տնօրեն Անահիտ Աղաջանյանը փորձել էր 2 նկատողություն տալու միջոցով աշխատանքից ազատել և հունվարի 20-ին ծանուցել էր աշխատանքից ազատելու մասին։
Առողջապահական և աշխատանքի տեսչական մարմինը արձագանքել է «Հետքի» հրապարակմանն ու այցելել մանկապարտեզ։
Հարուցվել է վարչական վարույթ։ Առողջապահական և աշխատանքի տեսչական մարմինը փետրվարի 6-ի որոշմամբ կարգադրել է չեղարկել «Դիլիջանի թիվ 1 մանկապարտեզ» ՀՈԱԿ-ի տնօրեն Անահիտ Աղաջանյանի 2025 թվականի նկատողությունների հրամանները։
Տեսչական մարմինը կարգադրել է նաև առոչինչ համարել ՀՈԱԿ֊ի տնօրենի ծանուցումը Արևիկ Ալիխանյանին աշխատանքից ազատելու մասին, ինչպես նաև Արևիկ Ալիխանյանին 2024 թվականի սեպտեմբերի 2-ից վարձատրել կատարած աշխատանքի ծավալներին համապատասխան։
Արևիկ Ալիխանյանի խոսքով, Տեսչական մարմնի աշխատակիցները փետրվարի սկզբին ասել են, թե շուտով պետք է մրցույթ հայտարարվի դաստիարակի թափուր հաստիքի համար։ Բայց մինչ օրս մրցույթ չի հայտարարվել։ «Հետքը» դիմել է Դիլիջանի համայնքապետարան՝ տեղեկանալու, թե ինչու՞ համայնքապետարանը դաստիարակի թափուր հաստիքի համար մրցույթ չի հայտարարում։ Համայնքապետի ընդունարանից ասացին, թե այդ հարցին կարող է պատասխանել միայն համայնքապետի խորհրդական Նոննա Գրիգորյանը, քանի որ հարցը նրա վերահսկողության տիրույթում է։ Նոննա Գրիգորյանը մեր զանգերին չպատասխանեց։ Մանկապարտեզի տնօրեն Անահիտ Աղաջանյանը, որի հետ խոսեցինք փետրվարի 25-ին, ասաց, որ հենց այդ օրը պատրաստվում են հայտարարություն հրապարակել դաստիարակի թափուր հաստիքի մրցույթի մասին։
Այսպիսով, Տեսչական մարմինը վերականգնեց մանկապարտեզի դայակի խախտված իրավունքները և չեղյալ համարեց նրան աշխատանքից ազատելու որոշումը։ Դաստիարակի հաստիքը մանկապարտեզում դեռ թափուր է, իսկ դայակ Արևիկ Ալիխանյանի ամուսինը, որ նույն մանկապարտեզում մինչ այս միջադեպը պահակ էր աշխատում և համայնքապետի խորհրդական Նոնա Գրիգորյանի դրդմամբ ազատման դիմում էր ներկայացրել, գործազուրկ է։ Մանկապարտեզում նրա հաստիքն արդեն զբաղված է։
Նյութը՝ hetq.am
