Շուրջ տասներկու տարի է, ինչ Շոտոկան կարատեի Հայաստանի ֆեդերացիան մարզչական գործունեություն է ծավալում Տավուշի մարզի Բերդի տարածաշրջանում։ Այդ տարիների ընթացքում բազմաթիվ երեխաներ մարզական ճանապարհ են անցել՝ գրանցելով հաջողություններ թե՛ հանրապետական, թե՛ միջազգային մրցահարթակներում։ Օգոստոսի 5-ին Բերդ համայնքի կարատեիստ սաները, մարզիչների և ծնողների ուղեկցությամբ, բարձրացան Չինարի գյուղի բարձունքում գտնվող Խորանաշատի վանքը, որտեղ տեղի ունեցավ տարվա ընթացքում լավագույն արդյունքներ արձանագրած մարզիկների պարգևատրման արարողությունը։
Արարողության համար ընտրված վայրը պատահական չէր։ Ավելի քան ութ դարերի պատմություն ունեցող Խորանաշատի վանքը դարեր շարունակ եղել է կրթության, գրչության և հոգևոր կյանքի կարևոր կենտրոն։ Այսօր, սահմանամերձ Չինարիի բարձունքում կանգնած, այն շարունակում է խորհրդանշել հայկական մշակույթի կենսունակությունն ու սահմանապահի աննկուն ոգին։
Պարգևների արժանացան միջազգային և հանրապետական մրցաշարերում մրցանակային տեղեր զբաղեցրած, ինչպես նաև գոտիների որակավորման քննությունները հաջողությամբ հանձնած սաները։ Մրցանակները հենց այս պատմական միջավայրում հանձնելու նախաձեռնությամբ կազմակերպիչները ցանկացել էին երեխաների մարզական նվաճումները կապել ազգային հիշողության և պատմամշակութային ժառանգության հետ՝ ընդգծելով, որ հաղթանակը ձևավորվում է նաև այն արժեքների վրա, որոնցով մեծանում է սերունդը։
Բերդի տարածաշրջանի պատանի կարատեիստների առջև նոր մրցաշարեր ու նոր փորձություններ են։ Խորանաշատի բարձունքից նրանք հեռացան արդեն նոր նպատակներով՝ իրենց հետ տանելով հերթական հաղթանակների ներհայաց հիշողությունն ու առաջ շարժվելու նոր մոտիվացիան։
